© 2015 All Rights Reserved

  • w-facebook
  • YouTube Clean
  • LinkedIn Clean
  • Instagram Clean

كم من هذة الصفات سيحملها شريك حياتك المستقبلي؟

 

هشام الشربيني – متحدث تحفيزي ومستشار دولي متخصص في رفع القدرات و المعنويات والإيمان بأن الأحلام ممكن تتحقق بأخذ الخطوات والمخاطر..


كيف تختار شريك حياتك

إن إختيارك لأصدقائك شبيه جداً بإختيارك لشريك حياتك .. قولى مين أصحابك أقولك إنت مين .. لو إنت ماشى مع أصدقاء السوء فهم تباعاً هيأثروا على حياتك بشكل سلبى .. لو إنت ماشى مع أصدقاء النجاح اللى هما دايماً بيحاولوا يوصلوا للأحسن ويشتغلوا على نفسهم ويتعلموا حاجات جديدة ومصممين على النجاح وعندهم أهداف كبيرة فمن الطبيعى إنك إنت كمان هتكون ماشى على نفس السياق ... بنفس الطريقة هى إختيار شريك حياتك .

هل إنت من الناس اللى عايزين يتجوزوا وخلاص سواء إذا كنت ولد أو بنت عايز جوازة وخلاص.. ولا إنت من الناس اللى عايزين يتجوزوا شخص متوافق مع رؤيتهم  (إحنا إتكلمنا قبل كده على الرؤية والأحلام والأهداف) و بيدفعهم للأمام؟ فأى من الأشخاص إنت؟
..

 تنبيه .. كلامى هنا للأشخاص اللى عايزين يصمموا حياتهم ومصرين على النجاح الساحق وليس شرطاً للأشخاص اللى بيرغبوا فى حياة بسيطة أو حياة عادية .. لو إنت عايز حياة عادية أو حياة بسيطة فإن الشروط والنقط الموجودة فى المجال ده قد تفيدك, ولكنها بالنسبة لك لن تكون ضرورية تباعا لتطلعاتك المستقبلية.
 

هناك نوعين من المواصفات .. مواصفات داخلية ومواصفات خارجية فى إختيار شريك الحياه

المواصفات الخارجية زى الشكل .. اللون.. الجنسية ..الجسم .. ونقاط أخرى شبيه لها وهى مائه فى المائه إختياراتك و دي حاجه ترجعلك شخصياً
.

المواصفات الداخلية .. يجب أن يتوافر فى شريك الحياة المواصفات التالية , ومرة أخرى يرجع الإختيار لك إذا كنت ترغب فى كل المواصفات دى أو مستعد إنك تتنازل وتختار بعضها فقط وفى النهاية ده كله هينعكس على حياتك.


الشخصية الإيجابية .. ابحث على شريك الحياة اللى بيبص على نص الكوباية المليان .. اللى بيبص إزاى يحل المشكلة بدل ما يدور على مين سبب المشكلة.. ده هيفرق كتير فى حياتك فى المستقبل لأن الدنيا دايماً بيحصل فيها مشاكل وبيحصل فيها تحديات ولذلك ساعات لما تكون التحديات "كما نعتقد أحيانا"  أكبر مننا ساعتها محتاجين حد جنبنا (شريك الحياة) يدعمنا للأفضل ويدفعنا للأمام.. ولذلك لو إخترت شريك الحياة بتاعك وهو شخص سلبى أو على الأقل شخص حيادي في حياتة عايش وخلاص, لا تتوقع منه الكثير من الدعم  لما الدنيا تبقى صعبه عليك لأنه قد يكون ببساطة معندوش علم أو معندوش اى فكره إزاى يتصرف أو يخفف عليك الضغط بخلاف الشخصية الإيجابية والتي دائما ما ستحفزك للخروج من المأزق حتي بدون العلم عن كيفية حل الموضوع..هذا لأن أساس تفكير الشخص الإيجابي هو التركيز علي مايمكن اصلاحة بغض النظر عن الظروف المحيطة و الإستسلام.
 

التطلعات .. أحد النقاط المهمه فى شريك الحياة إنه يكون عنده تطلعات متماشيه مع رؤيتك (الأحلام، الأهداف, الرؤية) ولذلك الشخص ده لازم يكون بيشتغل على نفسه، لازم يكون هو كمان عنده الرؤية الخاصه به المتماشية معاك، ويكون هو كمان بياخد خطوات إيجابية إنه يحسن حياته أو تحسن حياتها.. النقطة دى مهمه بالذات لو عندك رؤية كبيرة جداً قد تأخذ وقت لكى تتحقق, وبالتالى لازم يكون شريك حياتك بيشاركك فى الرؤية بتاعتك, أو إنتوا الإثنين يكون عندكم رؤية و اتجاة  مشترك علشان تانى وللمرة الثانية لما الدنيا تبقى صعبة تعرفوا إنتوا الإثنين تعتمدوا على بعض لأنكم عندكم هدف واحد وإنتم الإثنين ماشيين فى نفس الإتجاه.. بخلاف إن يكون الشخص عنده رؤية مختلفة تماماً ولما الدنيا بتبقى صعبه بتلاقيكوا ماشيين فى إتجاهات متعاكسة أو إتجاهات مختلفة وده بيصعب الحياة ما بينكم .. مثال .. زوجة هنرى فورد (مؤسس شركة فورد للسيارات) دائماً ما كانت تدعمه نفسياً ومادياً ، كانت مصدقة تماماً برؤيته وكانوا هما الإثنين عندهم رؤية مشتركة ولذلك حققوا نجاح ساحق ضد كل الظروف المحيطة! ... هل تعرف شخص متوافق جداً مع شريك حياته بحيث إن هما عندهم هدف أسمى مشترك بيشتغلوا عليه عشان يوصلوا له مع بعض؟ أزاي بيتعاملوا مع بعض؟ ازاي بيتعاملوا مع الحياة؟

 

أذكي منك. من المستحسن إن يكون شريك حياتك أذكى منك, وخاصة لو إنت راجل بلاش تفكر إنك (سى السيد) وصدقنى لما تختار بنت عندها تطلعات وذكية جداً أفضل من إنك تختار بنت كل اللى بتحلم بيه تتجوز وخلاص.. ملاحظة.. بالنسبة للبنات حتى لو كانت البنت مبتشتغلش وقاعده فى البيت (ربة منزل) فده مش معناه إن معندهاش تطلعات لأن ربة البيت اللى عندها تطلعات ومهتمة بالصحة ومهتمة بإنشاء أسرة .. تأكد إن الأسرة بطبيعة الحال سترتقى للأفضل وأزواجهم هيرتقوا للأفضل وأطفالهم يتم تربيتهم علي أساسيات النجاح.
 

الوعي الصحي .. دور على شريك حياة متهم بالصحة وعنده إهتمام فعلي علم بالحياة الصحية بالذات لو كان بنت .. لأن المرأة هى أساس الأسرة والأطفال والمستقبل بيعتمد عليهم بشكل أساسى .. ولذلك لما يكون شريك حياتك مهتم بالرياضة وبالصحة وإنه إزاى يعيش حياة صحية فإن حياتك سوف ترتقي للأفضل وبالتالى رؤيتك هتوصل لها بشكل أسرع ونجاحاتك هتبقى أكتر بكتير على عكس لو إنت كنت شخص غير مهتم بصحتك على..وده هينعكس على أطفالك وهينعكس على حياتك عموماً وهينعكس أيضا  على إختياراتك  اليومية فى حياتك .. فالنقطة دى مهمه جداً.

 

شريك الحياة يكون شخص مهتم بالفلوس وتحسين الوضع ولكن وفى نفس الوقت يكون غير مادى .. فيه فرق كبير ما بين إنك تكون مهتم بالفلوس وإنك تكون مادى .. الفلوس حاجه مهمه واللى بيفكر إن الفلوس غير مهمه يبقى غلطان .. فيه مقولة بتقول (إن الفلوس مبشتريش السعاده) ولكنى أضيف عليها (ولا الفقر بيشترى السعاده) .. الفكره مش إنك تجمع فلوس وتبقى غنى وخلاص ولكن الفكره إنك تكون على مستوى جيد جدا مادياً وبالتالى هتساعد الناس اللى حواليك , والناس اللى خارج نطاق أسرتك , والناس اللى بتيجى فى طريقك فإنت بتساعدهم لأنك تستطيع, وده أحسن ليك من إنك تكون معظم وقتك مشغول بتحاول تجمع فلوس علشان تعيش بس (بتحاول تطفو علي سطح الحياة), ولذلك شريك مفروض يكون شخص مركز على النجاح وإنه يساعد نفسه والناس اللى حواليه أفضل من إنه ميكونش عنده تطلعات.

 

الإحترام .. حتى لو ما إخترتش أى نقطة من النقاط السابقة فالنقطة الوحيدة اللى إنك لازم لا تتنازل عنها سواء كنت ولد أو بنت هى الإحترام المتبادل بينكم فى جميع الأوقات مهما كانت الظروف.. أبداً لا تسمح (لاتسمحى) للطرف الأخر بعدم الإحترام مهما كانت الظروف .. الإحترام هو أساس العلاقة ما بين الأشخاص حتى قبل الحب .. لما الدنيا بتبقى صعبة وهيجيلك مشاكل لأن هى دى طبيعة الحياة .. فده بينعكس وبيعمل إختبار للعلاقة بينك وبين شريك حياتك .. لو إنتوا بدأتوا العلاقة على الإحترام ومهما كانت الظروف برضو محترمين بعض فى الطريقة اللى بتتعاملوا بيها وبتتبادلوا الإحترام مهما كانت الحياة صعبة , فإن حياتكم-مهما كانت الصعوبات اللى بتواجهكم هتكون سهله .. بعكس الحال لما تقطة الإحترام تكون مش أساسية والدنيا بتبقى صعبة فإن  الإحترام المتبادل بيفقد أو بنبدأ نتصرف بطريقة مش مناسبة .. وده كله بيأثر سلبياً على العلاقة ما بين شركاء الحياة , وبالتالى  لو الإحترام غير أساسي أو قليل هيكون الخروج من المحن والصعاب أصعب بكتير.

 

إختبار ميداني ممكن تعملة النهاردة .. المرة الجاية لما تيجى تدخل على أى مول عايزك تروح وتقعد فى ردهة المطاعم وتراقب العائلات بيتصرفوا مع بعضهم إزاى .. راقب الكلام والنظرات ولغة الجسد ما بينهم وما وبين بعض.. أقعد وشوف إختياراتهم فى الأكل إيه .. والعلاقة ما بين الأكل اللى هما طلبوه وبين شكل أجسامهم و أجسام أولادهم (دى أحد الأساسيات بالذات للمرأة والإهتمام بالصحة زى ما إتكلمنا قبل كده) هتسمعهم بيتكلموا مع بعض حاول تستقى من خلال كلامهم هل الإحترام المتبادل موجود هل النقط اللى إتكلمنا عليها موجودة فيهم ولا لأ... وإسأل نفسك سؤال .. من من هؤلاء الأشخاص فى علاقة رائعة أود أن أكونها فى المستقبل؟


فترة الخطوبة هى فترة جميلة بيتسابق كل شخص إنه يظهر أحسن سمات عنده للشخص الأخر وبيحاول إنه يسعده ويوريله إن الدنيا جميلة - ودى حاجه كويسة مش حاجه وحشه خالص.. وكذلك ناس كتيرة بستخدم فترة الخطوبة عشان تدور على عش الزوجية ويبدأو يشوفوا إزاى هيعملوا الفرح ويخططوا لنفسهم إزاى هاتكون الخطوة الإنتقاليه إنهم يبقو متجوزين .. ولكن فترة الخطوبة أيضاً المفروض تكون فترة إختبار شخصية للشخص الأخر .. هى فترة إنت بتحاول تعرف الشخص الأخر ليس فقط الأجزاء الكويسه فى حياته لكن هل الشخص فعلا شريك حياة محتمل جيد جداً ولا شريك حياة محتمل ممتاز 
الناس عموما بطبيعة الحال كويسين إنما نوعية الشخصية بتظهر مع الصعاب

وزى ما قلت فى أول الكلام إن الموضوع دة  للأشخاص اللى عايزين يحققوا نجاح ساحق وليس مجرد حياة عادية .. ولذلك الإختيار فى الأول دايماً سهل .. إن يكون عندك تفاصيل ومواصفات معينة جواك بتحاول تحصل عليها فى الشخص ده .. وأخيراً الإختيار بيكون ليك .. هل عايز تتجوز وخلاص ؟ ولا عايز تأسس أسرة أساسها النجاح ؟ المقولة اللى بتقول (وراء كل رجل عظيم إمراة) ممكن نكمل عليها ونقول (وراء كل إمراة عظيمة رجل).. الفكرة بتمشى فى الإتجاهين .. لأن فى الأول و الأخر نجاح الفرد هو نجاح شريك الحياة الأخر لأن هما الإثنين عندهم فكرة وهدف أسمى ورؤية كبيرة مشتركة .. هو ده أساس الحياة الناجحة ما بين شخصين .  

أما لو كنت حاليا في علاقة ليس بها بعض النقاط السابقة في شريك حياتك و لكنك ترغب في أن تكون به فخليني أقترح انك تبدأ بنفسك و تطبق كل النقاط السابقة باتجاة شريكك و تباعا ستري الانعكاس علية و قريبا ما سيبدأ هو الأخر في التغير لللأفضل

كلمة أخيرة. لا تتنازل أبداً عما تريده حقاً
.

أتمنى لك النجاح الساحق ... هشام الشربينى

 #‎TheWakeUpCoach

  تابعونى على وسائل الإتصال الإجتماعية 


تابعونى على برنامج بريسكوب Periscope

  نزل برنامج بريسكوب على تليفونك أو التابلت بتاعك لأنى بعمل بث مباشر عن مهارات الحياه بشكل يومى , يمكنك متابعتى وسؤالى خلال البث

 

 

 

 

 

     

Please reload

تابعني علي الوصلات التالية

  • Periscope-icon
  • Facebook Social Icon
  • YouTube Social  Icon
  • Instagram Social Icon
  • Twitter Social Icon
  • Pinterest Social Icon

إعمل شير علي فايسبوك

دروس جديدة

February 13, 2016

Please reload