© 2015 All Rights Reserved

  • w-facebook
  • YouTube Clean
  • LinkedIn Clean
  • Instagram Clean

١٠ خطوات لإجتياز المقابلة الشخصية

 



بالذات لو إنت لسه بادئ حياتك المهنيه فأنا أعتقد أحد أهم أولوياتك إزاى تحصل على وظيفة.. مظبوط؟
السؤال الأولانى اللى عايزك تسأله لنفسك هو .. هل إنت عايز أى وظيفة اللى تجيبلك مرتب وخلاص.. ولا إنت بتختار علشان إنت عايز تشتغل شغلانه معينه عشان إنت بتحبها؟؟ .. أنا بتمنى إن تكون الإجابة الثانية هى اللى صح.
لزيادة فرصتك فى إنك تحصل على وظيفة و تعدى إنترفيو لازم تشوف نفسك من منظور الشخص أو الشركة اللى بتعملك االمقابلة لإنك ساعتها هتبقى عارف هما بيدوروا على إيه.. وتشكل نفسك على حسب هما عايزين إيه .. فتبين مميزاتك القوية اللى هما بيدوروا عليها
.
الحاجه الثانية اللى عايزك تفهمها وتركز فيها كويس اوى هو إنك "إنت مش بتشتغل عندهم.. إنت بتشتغل معاهم"..(إنت مش عبد) دايماً فكر فى نفسك على مستوى عالى.. دايماً.. متقللش من نفسك ولا من قيمة نفسك.
لما إنت بتفكر فى نفسك على مستوى عالى فده مش غرور.. فيه خط رفيع بين الغرور والثقة.. الشخص الواثق من نفسه هو اللى عارف قيمة نفسه وبيثبت للى قدامه قدرته على إنجاز الأشياء بطريقة سليمة ومش بيتعامل مع الناس بتعالى .. أما الشخص المغرور هو اللى بيظهر للى قدامه علمه بكل شئ  وبيتعامل مع الناس بطريقة متعاليه.
دلوقتى خلينا نتكلم عنك.. أول خطوة محتاج تعملها عشان تزود فرصتك إنك تعدى الإنترفيو أمام المتقدمين الاخرين لنفس الوظيفة

النقطة الأولي. هو إنك تجمع معلومات عن الشركة و تارخها وعن الوظيفة اللى إنت مقدم عليه
فى خبرتى حوالى  98%  من الشباب اللى بيقدموا على وظايف مجرد بيقدموا وخلاص.. مبيدورش على تاريخ الشركة ميعرفش معلومات عن الشركة.. وبالتالى دى تعتبر فرصة ذهبية ليك لأنك ساعتها إنت هيبقى عندك معلومات أعمق أكتر من من معظم الناس اللى بيقدموا.. يعنى بصورة أخرى لو فيه 100 بنى آدم قدم على الشركة دى فإنت تعتبر من أعلي 2% من المتقدمين من اليي عندهم معلومات عن الشركة لأنكم عملتم بحث ودورتوا على معلومات عن الشركة
(you have done your homework)

النقطة الثانية هى ملابسك..هدومك.. هدومك مش لازم تكون غالية ولا اخر موضة ولكن المفروض تكون نظيفة ومكوية.. بالنسبة للولاد جزمتك لازم تكون متلمعه.. وبالنسبة للبنات يكون شعرك شكله  كويس والمكياج يكون مناسب.. دايماً فكر هما بيبصوا عليك إزاى
.
النقطة الثالثة صوتك.. كام مرة سمعت حد بيتكلم وراك وإنت متعرفوش.. أو قابلت حد لأول مرة ومن أول كلمتين قالهم من نبرة الصوت نفسها عرفت إن الشخص ده واثق فى نفسه.. أوشخصيته ضعيفة.. أو مبسوط أو مضايق.. أو مكتئب.. وإلى ما ذلك من مشاعر وشخصيات متفاوتة.
نبرة صوتك مهمه جداً لأنها بتدل على شخصيتك وهى من أحد أول الإنطباعات بالذات لو كان أول إنطباع مع الشركة دى إنهم كلموك فى التليفون.. فلازم يكون صوتك واثق من نفسك وقوى - مش صوت عالى ولكن صوت قوى
 

(Handshake ) التقطة الرابعة هى المصافحة  

الأشخاص الواثقين فى نفسهم وعايزين يدوا صورة كويسة دايماً لما بيجوا يسلموا على حد بيسلموا بمصافحة قوية.. ده بيدل على ثقة بالنفس وعلى إنك إنت مش خايف تقدم نفسك.. فإستعمل المصافحة القوية ( متكسرش إيد الراجل اللى قدامك إضغط على إيده بس مش بشكل شديد) و دة بياخدنا للنقطة الخامسة
.
(Eye Contact) النقطة الخامسة الاتصال بالعين 
عاوزك تنظر مباشرة في عيني الشخص محل المقابلة بالذات عند المصافحة. دائما أنظر مباشرة في عيني الشخص لأن هذا دليل علي الثقة بالنفسو الاهتمام بالموضوع و هو أيضا من أساسيات التواصل الاجتماعي.


النقطة السادسة الجلوس.. عايزك وإنت قاعد فى الإنترفيو تقعد كأنك قاعد على كرسى أطفال.. ضهرك مفرود.. إيدك جنبك.. لأن الضهر المفرود بيوحى بالثقة.. إنما لما تكون قاعد على كرسى عادى او على مكتب الكمبيوتر ضهرك بيكون محنى للأمام وبالتالى ده بيدى إنطباع أقل شويه عنك خلال المقابلة.. بلاش تشنكل رجلك ومتربعش إيدك لأن ده بيصد الشخص  اللى قدامك نفسياً.

النقطة السابعة .. حاول يكون عندك مقدمة عن نفسك إنت عارفها.. المقدمة دى إنت حافظها وعارفها وتدربت عليها.. زى المقدمة بتاعتى ( أنا هشام الشربينى متحدث تحفيزى دولى مختص فى مجال رفع القدرات والإيمان بإن الأحلام ممكن تتحقق الي واقع حقيقي ملموس. أنا بساعد الشباب إنهم ياخدوا خطوات و مخاطر أكبر فى حياتهم لأن دة أساس النجاح الساحق..)  فإنت بالنسبة لك إيه المقدمة بتاعتك؟
يمكنك بناء مقدمة خاصة بك عن طريق مزج  بعض الإجابات للأسئلة التالية:
اسمك اية؟ أين تعيش؟ ما هي أحد هواياتك؟ ماهو طموحك؟ هل عندك خبرة سابقة في العمل..ماهي؟ لماذا تريد هذه الوظيفة؟.
لما حد يطلبك فى الإنترفيو ويطلبوا منك ويقولك إتكلم عن نفسك لازم تكون عارف إنت هتقول إيه أحسن ما تبدأ تفكر وفى الأخر تقول كلمتين وتسكت.. فدايماً حاول إن المقدمة بتاعتك يكون فيها جزء شخصى عن حياتك حاجه إنت بتحبها ..هوايه من هواياتك .. لأن ده بيعمل صلات خفيه  بينك وبين الشخص اللى بيعملك الإنترفيو.

النقطة الثامنة إسأل ! من حقك إنك تسأل فى أى إنترفيو..من حقك إنك تسأل عن معلومات عن الوظيفة عن مواعيد الشغل.. عن حتى المرتب (بس متسألش أسئلة كتير مجرد سؤال أو سؤالين يهموك كفاية..وده بيدى إيحاء بالثقة فى النفس)

النقطة التاسعة المرتب.. من خلال خبرتى لو الوظيقة اللى إنت مقدم عليها المرتب بتاعها هما محددين أو قايلين 1000جنيه فغالبا هم مستعدين إنهم يرفعوا الرقم لو إنت طلبت فلوس أكتر ممكن يوصلوا لغاية 20% زيادة أو 20% أقل.. يعنى ممكن يدفعوا لغايه 1200 أو ممكن ينزلو تحت ال1000 ب 20% فيدفعوا 800 .. دايماً الراجل اللى بيعملك الإنترفيو هيحاول على قد ما يقدر (مش فى جميع الشركات) إنه يعين أفضل شخص بأقل مبلغ ممكن اللى هو 800جنيه.. أو ميعديش أكتر مبلغ ممكن اللى هو 1200جنيه.. دى أحد نظريات التوظيف.

النقطة العاشرة .. عايزك تفهم إن الإنترفيو مفاوضة وليست فرصة وحيدة وهتروح عليك لو فتحت بقك
 (It is a not a Take it or leave it case )

دايماً إتكلم ومتخافش وتواصل مع الشخص اليي بيعملك المقابلة.. وده بيرجع لأول نقطة إتكلمنا فيها هل إنت بتحب الوظيفة مقدم عليها عشان حاببها وعايز تشتغل فيها وحابب المجال ده .. ولا مجرد إن إنت بتقدم على وظيفة وخلاص.. لو إنت بتحب الوظيفة اللى مقدم عليها إتكلم وميهمكش

 ودايماً إسال نفسك سؤال واحد .. والسؤال ده دايماً هو أهم سؤال ذو ثلالة أجزاء فى حياتنا لما نكون داخلين علي حاجة جديدة مش متأكدين من نتيجتها 
الجزء الأول من السؤال: ما هو أسوأ شئ ممكن يحصل؟
جاوب علي السؤال و حضر نفسك للعواقب و بعدين اسأل الشق التاني من السؤال: ما هو أفضل شئ ممكن يحصل؟ و جاوب علي السؤال بجميع المميزات و النتائج الإيجابية لو الموضوع نفع. و الان انت مستعد للجزء الثالث
من السؤال: ما الذي سوف تفعلة الان؟


في أي خطوة أو موضوع أو علاقة أو بيزنس بتاخدها في حياتك هتلاقي نتيجتين رئيسيتين ففي مثال الانترفيو:

 حضر نفسك قبل ما تروح الإنترفيو يإما الموضوع يمشى كويس ويبقى إنت أخدت خطوات وحضرت نفسك.. يإما ميمشيش ومتأخدش الوظيفة و لكنك إتعلمت وأخدت خبرة زيادة فى مجال التوظيف استعدادا للمرة القادمة.


أتمنى لك النجاح الساحق..
هشام الشربينى #TheWakeUpCoach   
 

 


 

Please reload

تابعني علي الوصلات التالية

  • Periscope-icon
  • Facebook Social Icon
  • YouTube Social  Icon
  • Instagram Social Icon
  • Twitter Social Icon
  • Pinterest Social Icon

إعمل شير علي فايسبوك

دروس جديدة

February 13, 2016

Please reload